Abrente. Voceiro da Secretaría da muller INTG
![](/adhuc/sites/default/files/styles/imagenes_interior/public/mujeres%20y%20cultura/CCG_ig_pub2012_Abrente_00-1.jpg?itok=Y6v3rSWU)
Publicación sindical de periodicidade irregular ilustrada editada pola Secretaría da Muller da Intersindical Nacional dos Traballadores Galegos (INTG). Nos dous primeiros anos aparece con periodicidade cuadrimestral e a partir do número 6 pasa a anual. Non se documenta ningún número nos anos 1991 e 1992; nos fondos do FESGA identifícanse as dúas entregas máis recentes como núm. 9 (1993) e núm. 10 (1994). O número 10 leva como subtítulo Secretaría da Muller da Confederación Intersindical Galega (CIG). Na primeira xeira, ata 1990, vai impresa a tinta lila sobre papel branco e inclúe un directorio da INTG. Nos números da segunda xeira, de 1993 e 1994 non consta o número nin o ano da publicación; mudan de deseño, formato e sobre papel branco presenta titulares impresos en lila e textos en negro.
Sobre a edición dixital
Preséntanse aquí os 10 números localizados de Abrente. Voceiro da Secretaría da Muller da Intersindical Nacional dos Traballadores Galegos (INTG), publicados entre 1986 e 1994. Non se localizou o número 3. Ao longo de toda a súa traxectoria publica, cando menos, un número co gallo do 8 de marzo. Trátase dun voceiro sindical, nacionalista e de clase que pretende recoller as denuncias e reivindicacións das traballadoras. As súas páxinas permiten seguir conflitos laborais e a precarización das obreiras en empresas concretas, en particular dos sectores máis feminizados, como a conserva, o téxtil, a limpeza, as perruquerías, as garderías, así como a situación das labregas. Ofrece novas da organización e das actividades internacionais.
A edición dixital, publicada en 2019, inclúe: resumo e datos da cabeceira; edición dixital íntegra en pdf; índice, índice documentado e resumo de cada número.
Esta edición dixital é un resultado do proxecto "Tránsfugas y parias modernas: género y exclusión en la cultura popular del s. XXI" ( FEM2017-83974-P).