Lieg aguest tèxte e indica s’es següentes senténcies son vertadères o fausses:
Carlòta e Anna gessen de classa.
Carlòta: Hè temps que t’ac digui, Anna, mos cau escarrabelhar!
Anna: Ac sabi! Mès, Carlòta, aguesta classa ei hastiosa, insuportabla, pesada, tediosa, endormidera…, e non sabi guaires causes mès!
Carlòta: Ah, ah, ah! Tostemp ès ua exagerada e un shinhau comediana. Dilhèu t’as d’inscríuer en classes de teatre. Ah, ah, ah!
Anna: Dilhèu…
Carlòta: Mos demoren tres setmanes de classes e encara podem hèr un bon projècte de fin de semèstre. Aguesti dies que vien mos i cau deishar era pèth.
Anna: Non pogui hèr arren damb aguesta matèria. Era matèria me shaute un pialèr mès eth professor me supère, m’endormisqui. Non pogui sauvar es uelhs dubèrti!
Carlòta: Pensi qu’es gessudes nocturnes an bèra causa a veir en aquerò. Ah, ah, ah! Mès auem besonh de mos i hicar.
Anna: Tè! Tu tostemp tan suenhosa. Dèisha-te d’aquerò, qu’ara çò que mos cau ei organizar eth sopar d’anet.
Carlòta: Tiò! E dempús dides. Va! Vam per faena. Loïsa e Miquèu pòrten es begudes: aigua; bières, damb alcoòl e sense; vin blanc, claret e arròi; chucs d’iranja, poma e persec. Arren de mès fòrt tà non auer un aute còp problèmes damb es vesins . Vau a méter ena pòrta d’entrada un panèu «NON SE PÒT INTRODUSIR BEGUDES ALCOOLIQUES» tà mos ne trufar.
Anna: Tanben auem de minjar! Pèir e jo pensam qu’era milhor ora tà encargar es pizzes ei tàs ueit. Marcèu a de contactar damb eth tà carrejar-les enquia aciu.
Carlòta: Coma eri s’encarguen dera intendéncia, sonque auem de premanir era logistica…
Anna (ath madeish temps): Moria, gojata, quin vocabulari!
Carlòta: …es toalhes e tovalhons de papèr, es siètes tanben de papèr e es veires de plastic. Aquerò ei plan aisit. Donques auem tota era tarde tà revisar er ensenhador deth projècte e començar a aprigondir en trabalh. Auem d’i méter talent!
Anna: Bon diu! Aciu, arrés non se pòt arturar! Non mos podem préner era tarde tranquillament e feniantejar? Me shaute de temps en temps èster guita!
—————————–